1F_17: Anaka, omeo Ahy ny fahakelezan’ny finoanao, ho soloiko ho tahaka ny finoan’ny apôsitôly sy ny mpaminany. Ny FINOANA sy ny FITIAVANA dia tsy afa-misaraka. Rehefa lasa olon’ny FINOANA, dia lasa tonga olon’ny FITIAVANA. Rehefa lasa olon’ny FITIAVANA, dia lasa tonga olon’ny FINOANA.

2B_12: Anaka, manomboka androany no tokony hizoranao amin’ilay làlana roa mirazotra, izany hoe : ny fanaikenao ny maha bitika anao sy ny fandraisanao ny Fitiavako. Ny zava-dehibe dia tsy ny fahafantaranao hoe aiza ho aiza ianao eo amin’io làlana io, fa ny fahazoanao antoka fa eo amin’io làlana io ianao. Efa eo amin’io làlana io ianao raha vao manome ny « ENY-NAO » amin’ny maha bitika anao, amin’ny fahosanao, amin’ny maha voafetra anao ary manome ny « ENY-NAO » handray ny Fitiavako.

1A_04: Ry zanako malalako, miaraka aminao lalandava Aho. Tsy manary anao mandrakizay Aho. Sarobidy loatra amiko ianao, koa raisiko an-tanana ny mikasika anao rehetra. Raisiko andraikitra koa ireo asanao rehetra.  

3A_23: Anaka, avia manatòna akaikikaiky eo amin’ny Foko mba hatsapanao bebekokoa ny Fitiavako. Mila anao Aho ; sarobidy ho Ahy ianao. Ekeo ny Fitiavako dia ho hitanao fa izay noheverinao fa manandanja dia tsy misy dikany. Mirehi-pitiavana ho anao Aho, tena tiako ianao.

2A_25: Ry bitikako, Tokony handroso ao anatin’ny finoana madio mandrakariva ianao na dia tsy fantatrao aza hoe mankaiza ny itondrana anao. Ny làlana izay nandalovantsika niaraka dia tsy manam-paharoa, tahaka anao tsy manan-tsahala. Dia ny nangatahana taminao koa dia tsy manam-paharoa.

1D_04: Anaka, mangalà fotoana tsara handray ny Fitiavana. Fotoana sarobidy izany ho anao. Ny Fitiavana ao anatinao hanova anao ary, rehefa voahova ianao, dia hiparitaka amin’ny fon’olona maro Izy. Ny ataonao dia ny mamela ny Fitiavana hiasa ao anatinao mba hitohy Izy hiasa amin’ny manodidina anao sy amin’ny alalanao.

1F_26: Anaka, raha mba fantatrao hatraiza ny itiavana anao sy ny vokatry ny Fitiavana ao aminao, dia tsy hanana faniriana hafa ianao ankoatran’ny hatongavanao miha bitika hatrany mba afahan’ny Fitiavana maka ny toerana rehetra. Tiako be ianao.

1F_27: Anaka, rehefa mandray izay zavatra rehetra mitranga aminao ianao fa avy amin’ny Ray ireny ka atolotrao Azy avokoa, dia ho tonga tahaka ny ranon’ando ho anao ny trangan-javatra tsirairay, izay hanampy hampangatsiatsiaka anao sy hampitombo anao ao anatin’ny Fitiavana. Tiako be ianao.

2A_29: Ry Bitikako, izay voarainao avy any an-danitra dia efa madio. Ny fankasitrahanao an’izany dia manampy amin’ny fanadiovana anao ; ary raha zarainao, dia mandray anjara ianao amin’ny fanadiovana ny hafa sy ny tany rehetra. Izay voarainao avy amin’ireo olona hafa, na tsara izany na ratsy, dia tsy mampisy voka-dratsy ho anao, raha toa ka tsy tehirizinao ho anao ; fa kosa raha atolotrao avy hatrany an’Andriamanitra, dia ho voadio tanteraka.

3A_06: Ry zazakely, amin’ny fonao no tiako resahana : manaiky ve ianao hanome Ahy ny « ENY-NAO » feno tsy misy fepetra ? Manaiky ve ianao hamoy ny fahafinaretanao, sy ny fiadanam-piainanao mba hanatanteraka ny sitrapoko ? Mila anao Aho ; sarobidy ho Ahy ianao. Avelao Aho hiteny aminao fa mirehi-pitiavana ho anao ny Foko. Tena tiako loatra ianao.