1F_09: Anaka, reko ny vavakao, ataoko vavako ny vavakao ary dia atolotro ny Ray. Raisiko ny fijalianao. Atambatro amin’ireo fijaliako mba ho fehezan-draozy atolotra ny Ray. Tsy misy tokony ho atahoranao, efa mitopy eo aminao ny Masony. Tiako ianao.

1B_32: Anaka, mianàra matoky Ahy, manaiky ho tiaviko. Izaho, Jesoa, dia tia anao amin’ny maha ianao anao io izao. Vitanao ve ny miteny toy izany koa amin’ny tenanao? Izao ny fanovàna tiako ho tanterahina ao aminao mba ho tsapanao fa tiako ianao, ary ho tia ny tenanao bebekokoa ianao amin’ny maha ianao anao io. Mitobaka Fitiavana ho anao ny Foko.

2A_14: Ry bitikako, nohariana tamin’ny Fitiavana ianao mba ho tonga IRAY aminy ; ny fifandraisana amin’izy roa dia ny fonao. Mila mianatra miaina eo amin’ny fonao izany ianao ; izany no ianaranao rehefa mitoetra samy irery miaraka Amiko ao anatinao lalina iny ianao.

1C_19: R’ilay Bitikako, ny « Eny » voalohany izay tokony homenao, dia ny hanekenao fa tia anao Andriamanitra. Ny « Eny » faharoa dia ny hitiavanao ny tenanao tahaka izao naharian’Andriamanitra anao toy izao. Ary ny tohiny izany dia ireo « Eny » izay manapaka ireo fatorana nataon’ny fahavalo, mba hidirana bebekokoa ao anatin’ny Fon’Andriamanitra. Ny làlan’ny Fitiavana dia tsotra sady mora ho an’izay miroso feno sy tanteraka amin’izany.

1D_24: Anaka, avia mifitsaka eto an-tsandriko. Ekeo izay rehetra mitranga aminao. Na toe-javatra mahafaly na mampalahelo, atolory Ahy daholo ireny! Misy ilaivana azy daholo ireny, misy antony ny fisian’ireny, na ho anao na ho an’ireo olona izay mitoetra ao am-ponao.

1C_07: Anaka, avia hihaona amiko ao anatinao. Amin’ireny fihaonana ireny, dia tonga manovo amin’ny Fitiavako ianao izay mitondra Fiadanana sy Fifaliana ho anao : izany no tena fiarovana marina. Ny Fiadanana izay irinao ao aminao, dia tsy ho hitanao raha tsy ao anatin’ny tenanao, fa tsy ho eo ivelan’ny tenanao mandrakizay : Izany no làlana malalaka hampidirako anao amin’izao fotoana izao, miaraka amin’ny fanaikenao.

1F_19: Anaka, tsy misy fijaliana izay mihatra aminao ka tsy ilainao. Ny fijaliana na kely na lehibe, na maivana na mavesatra, na fohy na lava, dia tena manandanja lehibe ho anao. Ilain’ny olombelona koa ny fijaliana mba hivoarany, tahaka ny orana amin’ny voninkazo.

3A_39: Anaka, rehefa manampy ny hafa ianao, na dia maimaimpoana aza dia ho afaka hahazo izay ilainao amin’ny fivelomanao. Isaky ny manampy olona ianao, dia Izaho izay Andriamanitrao no tompoinao. Hamaliako izany fihetsikao malala-tànana izany dia Izaho no hanome izay ilainao rehetra.

2B_15: Anaka, ilay ankizivaviko, Maria, dia nomeko iraka mba hanaraka anao, hitantana ny dianao. Eo Izy, eo akaikinao ; ary eo amin’ilany, dia ny Zanako lahy tokana, Jesoa, tena akaiky anao. Raha mihiratra ny masonao ka mahita ireo Olo-masina sy ireo tafika lehiben’Anjely, dia ho fantatrao fa tsy irery ianao, fa tena voadidina tsara. Aza matahotra, mandrosoa mandrakariva ao anatin’ny Finoana madio. Omeko anao ny tso-dranon-dRay miaraka amin’ny Fitiavako.

2A_39: Ry perla sarobidy izay entiko ao amin’ny Foko, tiako hambara aminao ny hafaliako mijery anao, mandinika anao, amin’ny andro sy ny alina. Diloilo mampitony ny Foko maratra ianao. Ankafiziko ireny fotoana hifandraisana am-pitiavana izay avelanao hisy miaraka aminao ireny.