1C_19: R’ilay Bitikako, ny « Eny » voalohany izay tokony homenao, dia ny hanekenao fa tia anao Andriamanitra. Ny « Eny » faharoa dia ny hitiavanao ny tenanao tahaka izao naharian’Andriamanitra anao toy izao. Ary ny tohiny izany dia ireo « Eny » izay manapaka ireo fatorana nataon’ny fahavalo, mba hidirana bebekokoa ao anatin’ny Fon’Andriamanitra. Ny làlan’ny Fitiavana dia tsotra sady mora ho an’izay miroso feno sy tanteraka amin’izany.

1D_24: Anaka, avia mifitsaka eto an-tsandriko. Ekeo izay rehetra mitranga aminao. Na toe-javatra mahafaly na mampalahelo, atolory Ahy daholo ireny! Misy ilaivana azy daholo ireny, misy antony ny fisian’ireny, na ho anao na ho an’ireo olona izay mitoetra ao am-ponao.

1C_07: Anaka, avia hihaona amiko ao anatinao. Amin’ireny fihaonana ireny, dia tonga manovo amin’ny Fitiavako ianao izay mitondra Fiadanana sy Fifaliana ho anao : izany no tena fiarovana marina. Ny Fiadanana izay irinao ao aminao, dia tsy ho hitanao raha tsy ao anatin’ny tenanao, fa tsy ho eo ivelan’ny tenanao mandrakizay : Izany no làlana malalaka hampidirako anao amin’izao fotoana izao, miaraka amin’ny fanaikenao.

1F_19: Anaka, tsy misy fijaliana izay mihatra aminao ka tsy ilainao. Ny fijaliana na kely na lehibe, na maivana na mavesatra, na fohy na lava, dia tena manandanja lehibe ho anao. Ilain’ny olombelona koa ny fijaliana mba hivoarany, tahaka ny orana amin’ny voninkazo.

3A_39: Anaka, rehefa manampy ny hafa ianao, na dia maimaimpoana aza dia ho afaka hahazo izay ilainao amin’ny fivelomanao. Isaky ny manampy olona ianao, dia Izaho izay Andriamanitrao no tompoinao. Hamaliako izany fihetsikao malala-tànana izany dia Izaho no hanome izay ilainao rehetra.

2B_15: Anaka, ilay ankizivaviko, Maria, dia nomeko iraka mba hanaraka anao, hitantana ny dianao. Eo Izy, eo akaikinao ; ary eo amin’ilany, dia ny Zanako lahy tokana, Jesoa, tena akaiky anao. Raha mihiratra ny masonao ka mahita ireo Olo-masina sy ireo tafika lehiben’Anjely, dia ho fantatrao fa tsy irery ianao, fa tena voadidina tsara. Aza matahotra, mandrosoa mandrakariva ao anatin’ny Finoana madio. Omeko anao ny tso-dranon-dRay miaraka amin’ny Fitiavako.

2A_39: Ry perla sarobidy izay entiko ao amin’ny Foko, tiako hambara aminao ny hafaliako mijery anao, mandinika anao, amin’ny andro sy ny alina. Diloilo mampitony ny Foko maratra ianao. Ankafiziko ireny fotoana hifandraisana am-pitiavana izay avelanao hisy miaraka aminao ireny.

3B_10: Anaka, atolory an’ny Ray avokoa na ny mahafinaritra na ny mahasosotra, na ny tsara na ny ratsy. Tsy havesatra aminao intsony io lasanao io raha omenao ny Famindram-pon’ny Ray satria tsy hilanja izany intsony ianao. Apetraky ny Ray eo ambanin’ny tongotrao ny lasanao, tahaka ny vato, mba hisondrotanao mankany Aminy.

1C_37: Anaka, Tiako ho tonga Fitiavana ianao tahaka Ahy ! Izay no tena nanirahina anao, iraka izay nahariana anao ! Sambatra ianao raha tafiditra amin’io nanirahina anao marina io, no sady miaina eto ambony tany…dia noho izany ho tonga fitaovana eo ampelan-tànan’ny Ray ianao mba hiantso ny hafa izay miaina eto an-tany mba hiditra ihany koa amin’izay nanirahana azy.

1F_10: Anaka, ekeo izao fiainanao izao tahaka ny tsara indrindra ho anao amin’izao fotoana izao. Tsy mila mahatakatra ny hevitr’izany ianao, ny ilaina dia ny hanoloranao ny « eny » tanteraka tsy misy fepetra, ary ny hanekenao fa tena tiako ianao.